قال الإعلامي عمرو أديب إنه تحدث من قبل عن زيادة أسعار البيض «والناس قعدت تعمل نُكت وحوارات».
وخلال تقديم برنامج «الحكاية» عبر فضائية «إم بي سي مصر» أضاف أديب: «يا جماعة الأسعار بتزيد في معظم الدول، لكن بيفكروا في حلول، والوضع ليس سهلًا، وكل همنا سعر الجبنة البيضة بكام ودلوقتي بقت بكام؟».
وواصل أديب: «الأشهر القادمة أصعب أيام الأزمة، وأنا بقولكم أهو الأسعار أقوى من أي حد، وبتهرس أي حد».
وأكمل أديب: «يجب على الدولة أن تتحدث مع الناس، وهل إحنا كمواطنين قررنا نقاطع السلع المرتفعة السعر؟ يا جماعة ده زمن تجار الغذاء.. وأي حد عنده فدانين خيار الله يسهلّه، فين الترشيد؟ لو سمحتوا درجة حرارة التكييف تكون عالية.. وبلاش تولعوا النور كتير، واللي بياكل بيضتين كفاية واحدة.. وطبعا بعد الجملة دي هتطلع نكت جديدة بس مش مهم».
وأردف أديب: «ياريت كل مجموعة يركبوا عربية مع بعض علشان نوفّر.. الدنيا مش زحمة يا جماعة.. والفترة الجاية صعبة».
