«نجلاء رشاد »تكتب ازاي اخس من غير مجهود

ازاي اخس من غير مجهود

شويه خطوات بسيطه تساعدك انك تخسر وزن بسرعه

-اول حاجه صغر طبقك، كده وجبتك هتكون صغيرة وهتعرف تتحكم في حجم الاكل لان في ناس كتير بتاكل اكل صحي بس بكميات اكبر من حاجتها اليوميه

-اشرب كوباتين مايه قبل كل وجبه عشان تملا بطنك وتحس بالشبع بدري

-كل بروتين مع كل وجبه عشان البروتين بيشبع وبيقلل من حاجتنا للتحليه- مش هتحب تاكل حاجه مسكره لو واكل بروتين كويس

-قلل النشويات البيضا زي الرز الابيض والمكرونه والعيش

مفيهومش فايده وسعراتهم عاليه ، بدلها بالرز البني والمكرونه البني والرز البني ( عالي في الالياف)

-كتر من الالياف في اليوم عشان نحس بالشبع ونحافظ علي مستوي السكر في الدم

– امنع السكريات علي اد ما تقدر لان سكر = كرش

– متضيعش سعراتك اليوميه في العصاير الاحسن تاكل الفاكهه كامله عشان الالياف

-تجنب الكربوهيدرات بالليل ، خلاص اتغدينا ؟كفايه

كربوهيدرات ( نشويات ) و ملهوش لازمه العيش بالليل

-تجنب الفاكهه قبل النوم- ايوه الفاكهه صحيه بس التوقيت مهم لو هرمون الانسولين طلع بالليل هيضعف عمليه حرق الدهون

-ابعد عن الاكلات السريعه وخليها مره واحده في الاسبوع ولو في يوم ضعفت واكلت حاجه بره نظامك كمل يومك صح ومتقولش هبدأ بكره علي نضافه، لو موبايلك وقع هتجيبه مش هتسيبه لتاني يوم

-كل خضاااااار … مبحبهوش طيب … خلاص خليك طخين

الخضار هو دوا الجسم بكل بساطه لو عندك لخبطه في هرمونات الجسم مخلياك مش عارف تخس اكل الخضار وخصوصا الاخضر منه هيساعدك تنضف جسمك

-اتجنب الاكل اللي فيه ملح كتير عشان الملح بيحبس المايه في الجسم وبتبان اطخن والعضلات بتستخبى

– مش لازم تنام شبعان . كل اللي يسندك ونام خفيف

– اصحي افطر زي الملوك من الاكل الصحي، وجبه الفطار بتحافظ علي ثبات مستوي السكر في الدم ده معناه مش هتضعف وتلخبط في الاكل

– حضر اكل الاسبوع عشان منضعفش ونجيب اكل من بره

-ابدأ دلوقتي نظم اكلك واتحكم في حياتك كلها وكلمه للبنات حته الشيكولاته مش هتخليكي مبسوطه ، شكلك وجسمك وصحتك هما اللي هيسعدوكي